Rio Ferdinand fyrrum varnarmaður Manchester United hefur teiknað upp þau níu vandamál sem Erik ten Hag hefur þurft að eiga við utan vallar hjá félaginu.

Ten Hag hefur stýrt United í 16 mánuði en allt hefur í raun logað stafnanna á milli frá því að hann tók við. Um er að ræða málefni utan vallar.

„Hann hefur stýrt liðinu í 16 mánuði og þetta hefur gerst, vandamálið með Ronaldo, Rashford var varamaður því hann mætti of seint á fund. Mótmæli gegn Glazer, söluferlið hjá Glazer fjölskyldunni sem fram og til baka,“ segir Ferdinand og heldur áfram.

„Sancho fer í þriggja mánaða frí af persónulegum ástæðum, Greenwood sagan, núna er það Antony sagan, vandræði með Sancho. Svo er það Maguire sem er sviptur fyrirliðabandinu en fer ekki vegna meiðsla hjá öðrum leikmönnum.“

„Ímyndið ykkur bara að þurfa að eiga við þetta allt, ég er ekki að afsaka hann en þetta er mikið. Þú vilt sem þjálfara bara þjálfa liðið og þurfa ekki að eiga við aðra hluti. Þetta er Manchester United og allar fréttir eru stórar, hann var að ná að bæta liðið undir lok síðasta tímabils en það sést ekki núna.“