Íþróttavikan er farin að rúlla á ný á 433.is og í Sjónvarpi Símans undir hlekk Hringbrautar. Helgi Fannar Sigurðsson og Hrafnkell Freyr Ágústsson stýra þættinum áfram en gestur í fyrsta þætti er handboltasérfræðingurinn Arnar Daði Arnarsson.

Manchester United ákvað á dögunum að losa sig við Mason Greenwood eftir um hálfs árs langa innanbúðarrannsókn sem haldin var í kjölfar þess að mál gegn honum var látið niður falla.

„Mér finnst bara skrítið að við séum að ræða þetta. Þó hann hefði verið leikmaður Stokkseyri, þetta er bara ekki séns,“ sagði Arnar í þættinum.

Það er óljóst hver framtíð Greenwood verður.

„Það er talað um að Sádar vilji ekki einu sinni taka við honum og þegar þeir eru farnir að sjá í gegnum vitleysinu segir það ýmislegt.“

Helgi tók til máls og gagnrýndi United fyrir hvernig félagið stóð að málinu.

„Manchester United hélt hálfs árs rannsókn áður en þeir komust að niðurstöðu. Voru þeir ekki svolítið að skjóta sig í fótinn með því? Mér finnst þeir hafa gert báðar hliðar reiðar með þessu. Flestir vildu ekki sjá hann aftur og þeir gerðu þá reiða með því að virðast íhuga það og þessir fáu sem vildu hann aftur eru líka brjálaðir því hann var látinn fara í burtu. United skíttapar í þessu máli.“

Umræðan í heild er í spilaranum.