Vanda Sigurgeirsdóttir formaður KSÍ staðfestir í samtali við DV að sambandið hafi fengið ábendingu um að búið sé að kæra landsliðsmann í knattspyrnu fyrir kynferðisbrot.

Samkvæmt heimildum DV er um að ræða Albert Guðmundsson, knattspyrnumann hjá Genoa. Kona hér á landi hefur lagt fram kæru til lögreglu vegna meints brots Alberts á Íslandi í sumar.

„Ég get staðfest að það kom ábending á okkar borð um kæru vegna kynferðisbrots landsliðsmanns,“ segir Vanda í samtali við DV en vill ekki greina frá nafni leikmannsins.

Vanda segir að starfsmönnum sambandsins hafi verið tilkynnt um málið í dag, en samkvæmt reglum KSÍ má ekki velja leikmann í landsliðsverkefni á meðan mál sem þessi eru á borði lögreglu.

Albert snéri aftur í íslenska landsliðið í sumar þegar Age Hareide tók við þjálfun liðsins en Albert hafði ekki verið í hópnum í heilt ár.

Albert er 26 ára gamall en hann var í byrjunarliði Genoa í leik í efstu deild á Ítalíu um liðna helgi. Albert hefur á ferli sínum leikið í Hollandi og nú á Ítalíu í átján mánuði.