Mason Greenwood hefur gefið út yfirlýsingu í kjölfar þess að Manchester United tilkynnti það að hann myndi ekki vera áfram í herbúðum félagsins. Innanbúðarrannsókn leiddi ákvörðunina í ljós og var hún tilkynnt fyrr í dag.

Meira
Stórtíðindi berast frá Englandi – Greenwood spilar ekki fyrir Manchester United á ný

Greenwood hefur ekki æft eða spilað með United í átján mánuði eftir að unnusta hans sakaði hann um nauðgun og ofbeldi í nánu sambandi.

Málið var fellt niður fyrr á þessu ári og hefur Manchester United síðan skoðað málið hjá sér.

Nú er niðurstaða komin í málið og telur félagið heppilegst að Greenwood haldi knattspyrnuferli sínum áfram annars staðar en hjá United.

Greenwood tekur í svipaðan streng og segir ákvörðunina um að fara hans og félagsins. Hann segist hins vegar saklaus af þeim ásökunum sem á hann voru bornar.

Kappinn stefnir á að bæta sig sem knattspyrnumaður og manneskja hjá öðru félagi.

Yfirlýsing Greenwood
Ég vil byrja á því að segja að ég skil þau sem dæma mig út frá því sem þau hafa séð og heyrt á samfélagsmiðlum. Ég veit að fólk heldur það versta. Þegar ég var að alast upp var mér kennt að hvers konar ofbeldi í sambandi væri rangt.

Ég gerði ekki það sem ég er sakaður um og í febrúar var ég hreinsaður af öllum ásökunum. Hins vegar viðurkenni ég það að hafa gert mistök í sambandinu mínu og tek ábyrgð á þeim. Ég er að læra og veit að ég þarf að vera góð fyrirmynd sem atvinnumaður í knattspyrnu. Ég er einbeittur á þá miklu ábyrgð sem það verður að vera faðir og góður maki.

Ákvörðunin í dag er hluti af sameiginlegu ferli Manchester United, fjölskyldu minnar og mín. Besta ákvörðunin fyrir okkur öll er að ég haldi áfram með minn feril annars staðar en á Old Trafford, þar sem viðvera mín mun ekki hafa truflandi áhrif á félagið.

Ég vil þakka félaginu fyrir að hafa stutt mig frá því ég kom aðeins sjö ára gamall. United verður alltaf hluti af mér. Ég er svo þakklátur fyrir fjölskyldu mína og þá sem standa mér næst fyrir stuðninginn og nú þarf ég að endurgjalda traustið sem ég hef fengið. Ég ætla mér að verða betri knattspyrnumaður, en aðallega góður faðir, betri manneskja og að nýta hæfileika mína til góðs innan vallar sem utan.