David Beckham, eigandi Inter Miami, hefur tjáð sig um þá erfiðu ákvörðun að reka Phil Neville úr starfi fyrr á árinu.

Beckham og Neville eru góðir vinir en þeir voru saman hjá Manchester United í langan tíma.

Það var erfitt fyrir Beckham að reka vin sinn úr starfi en Neville hafði starfað sem þjálfari Inter Miami í um tvö ár.

Eftir slakt gengi á þessu tímabili var Neville látinn fara og er Gerardo Martino nú tekinn við keflinu.

,,Því miður, sem eigandi þá þarftu að taka erfiðar ákvarðanir. Við vorum með Diego Alonso á fyrsta tímabilinu og rétt svo komumst í umspilið,“ sagði Beckham.

,,Ég taldi það vera rétt að breyta til, við vorum ekki alveg á réttum stað. Ég hugsaði með mér að við þyrftum einhvern sem myndi sjá um allt, mætir klukkan sex á morgnanna og fer heim klukkan sjö – einhvern sem kemur með menningu ekki bara til Inter Miami heldur borgarinnar. Það er nákvæmlega það sem Phil gerði.“

,,Ég hef þekkt Phil lengi svo að fá hann til félagsins var stórt skref, hann gerði frábæra hluti yfir tvö ár með leikmönnum og starfsliðinu.“

,,Hann sýndi þessu meiri áhuga en á vellinum vorum við ekki alveg að skila okkar svo því miður þurftum við að breyta til.“

,,Hann vissi að þessi ákvörðun væri að koma og tók því eins og herramaður.“