Eric Dier ræddi átakanlegt viðtal vinar síns, Dele Alli, við enska fjölmiðla. Hann átti erfitt með áhorfið.

Dier og Alli léku saman með Tottenham og enska landsliðinu og eru góðir vinir. Sá síðarnefndi fór í viðtal við Gary Neville á dögunum þar sem öll spilin voru lögð á borðið.

Hann opnaði sig um að hafa verið kynferðislega misnotaður af vini móður sinnar aðeins sex ára gamall, að hann hafi farið að selja eiturlyf átta ára gamall og einnig að hann hafi orðið háður svefntöflum sem atvinnumaður í knattspyrnu.

„Það var mjög erfitt að horfa á þetta. Tilfinning mín var sú að ég vildi að ég hefði getað gert meira,“ sagði Dier við The Sun á viðburði í Síngapúr.

Dier var ekki meðvitaður um að uppeldi Dier hafi verið svona erfitt. „Ég vissi ekki af þessu.“

Alli minntist á það í viðtalinu að Dier hafi reynst honum traustur vinur og það kemur fram að sá síðarnefndi hafi brotnað niður á þessu stigi viðtalsins.

„Hann hefur líka verið frábær vinur. Þetta er ekki bara í eina átt. Hann hefur gert hluti fyrir mig sem ég met mikils. Ég veit að ég gæti hringt í hann núna og hann myndi koma ef ég þyrfti á honum að halda, þó ég sé í Síngapúr. Svoleiðis vinur er hann bara,“ segir Dier.

Alli er nú snúinn aftur til Everton eftir misheppnaða lánsdvöl hjá Besiktas á síðustu leiktíð. Hann vonast til að koma ferli sínum af stað á ný eftir afar erfiða tíma.