Íþróttafréttamaðurinn Hörður Magnússon er einn þeirra sem er í óvissu varðandi sín störf eftir að skrifað var undir samstarf Viaplay og Sýnar. Segja má að Hörður hafi gengið í gegnum endurnýjun lífdaga á skandinavísku streymisveitunni, sem hann gekk til liðs við fyrir rúmum þremur árum og hefur lýst mörg hundruð knattspyrnuleikjum svo sómi er að.
„Eftir 37 hamingjusama mánuði hjá Viaplay er komið að leiðarlokum hjá mér. Ég lýsti mínum síðasta leik hjá þessu fína fyrirtæki 20.júní. Ákaflega þakklátur fyrir tækifærið. Margir eftirminnilegir leikir sem telja hátt í 600 hundruð. Þar á meðal Real Madrid gegn Liverpool á Stade de France og landsleikir í Ísrael og Albaníu. Afríkukeppnin, Copa America, danska superligan og Bundesligan svo fátt eitt sé nefnt,“ segir Hörður í færslu á Facebook-síðu sinni.
Segist markahrókurinn fyrrverandi fullviss um að hann hafi vaxið í starfi.
„Ég held að þessi reynsla hafi gert mig að betri lýsanda og víkkað sjóndeildarhringinn. Eftir 2 vikur tekur við HM kvenna á RÚV og bikarúrslit en síðan hef ég ekki hugmynd um hvað tekur við,“ segir Hörður.
