Aron Einar Gunnarsson var léttur á blaðamannafundi íslenska karlalandsliðsins fyrir leikinn gegn Portúgal í undankeppi EM 2024 á morgun.

Ísland mætir Portúgal í fjórða leik sínum í undankeppninni en Strákarnir okkar töpuðu gegn Slóvakíu á laugardag. Staðan í riðlinum er nokkuð þung.

Það muna margir eftir því þegar Cristiano Ronaldo, stjarna Portúgal, vildi ekki skipta um treyju við Aron eftir leik þjóðanna á EM 2016. Aron mun ekki spyrja um treyju Ronaldo á morgun.

„Nei, ég held ég sleppi því. Ég held að hann vilji líka eiga þessa treyju því þetta er 200. leikurinn hans,“ sagði Aron léttur í dag.

Ronaldo var í brennidepli eftir leikinn gegn Íslandi 2016, sem lauk með jafntefli. Hann gagnrýndi íslenska liðið fyrir að fagna ákaft.

„Á þeim tíma var maður smá sjokkeraður yfir þessu því það var svo stórt að ná jafntefli gegn svona sterku liði,“ sagði Aron á blaðamannafundinum um þau ummæli.