Enskir miðlar greindu frá því í dag af hverju Ivan Toney, leikmaður Brentford, fékk eins langt bann og raun bar vitni fyrir að brjóta veðmálareglur. Í kjölfarið sköpuðust heitar umræður hér heima á Twitter.

Toney fékk á dögunum átta mánaða bann fyrir að brjóta veðmálareglur í yfir 100 skipti en nú hefur verið greint frá alvarlegustu brotum hans.

Þar á meðal voru 13 veðmál sem hann setti á að sitt eigið lið, þau veðmál lagði hann frá ágúst 2017 fram í mars 2018.

Toney veðjaði 13 sinnum á eigið lið, ellefu sinnum veðjaði hann á að Newcastle myndi tapa en hann var þá samningsbundinn félaginu. Hann var á láni hjá Wigan þegar veðmálin voru lögð.

Í mars 2018 lét hann svo vin sinn vita að hann myndi byrja næsta leik en það telst einnig vera brot.

Sigurður Gísli Bond Snorrason var fyrr á þessu ári dæmdur í eins árs bann frá knattspyrnuþátttöku af KSÍ fyrir að brjóta veðmálareglur. Veðjaði hann meðal annars á fimm leiki með eigin liði, þó aldrei gegn því.

Sindri Sverrisson, blaðamaður á Vísi, skrifaði pistil eftir að Sigurður hafði verið dæmdur í bann þar sem hann kallaði eftir því að refsingin yrði harðari.

Sigurður rifjaði þetta upp eftir fréttirnar af Toney í dag.

„Spurning hvað trúðurinn Sindri Sverris segir um þetta! Eðlilega fékk ég lengra bann en Toney,“ skrifaði hann á Twitter.

Sindri svaraði og birti eftirfarandi bút úr niðurstöðu KSÍ í máli Sigurðar: Á meðal leikjanna sem Sigurður Gísli Bond Snorrason veðjar á, skv. meðfylgjandi yfirliti frá Pinnacle, eru fimm leikir hjá hans eigin félagi/liði keppnistímabilið 2022 (mfl. karla Afturelding) og tók hann sjálfur þátt í fjórum þeirra. Í öllum þeim tilfellum veðjar hann á fjóra leiki saman í pakkaveðmáli. Veðmálið gengur út á að skoruð verði þrjú mörk eða fleiri í hverjum og einum af þeim fjórum leikjum. Til þess að veðmálið gangi upp þurfa s.s. að vera skoruð fleiri en þrjú mörk í hverjum og einum af þeim fjórum leikjum.

Við þetta bætti Sindri: „Þú hafðir beinlínis hag af því að fá á þig mark, í leikjum sem þú spilaðir. Já, tel það alvarlegra og verðskulda 2-3 ára bann.“

Sigurður svaraði á ný. „Skynja ég stærsta small dick energy sögunnar?“

Hér að neðan má sjá samskiptin.

Þú hafðir beinlínis hag af því að fá á þig mark, í leikjum sem þú spilaðir. Já, tel það alvarlegra og verðskulda 2-3 ára bann. pic.twitter.com/ixJQdoIphL

— Sindri Sverrisson (@sindrisverris) May 26, 2023

Skynja ég stærsta small dick energy sögunnar? https://t.co/ZIRNvamP9O

— Sigurđur Gísli (@SigurdurGisli) May 26, 2023