Sindri Sverrisson, blaðamaður á Vísir.is segir aga- og úrskurðarnefnd KSÍ hafa gert mistök með því að dæma Sigurð Gísla Snorrason í bann út árið.
Sindri skrifar pistil á Vísir í dag þar sem hann fer yfir málið. Sigurður Gísli var dæmdur í bann út þetta keppnistímabil hjá KSÍ vegna brota á reglum um veðmál.
Sigurður veðjaði fjórum sinnum á leiki Aftureldingar síðasta sumar þar sem hann var leikmaður. Sigurður áfrýjaði dómnum en honum var ekki breytt. Hluti af þeim veðmálum sem Sigurður lagði var á fjölda marka í leik Aftureldingar.
„Þetta er kannski ekki alveg jafnslæmt og að veðja á tap eigin liðs, en samt eiginlega. Fjárhagslegur hagnaður af því að fá á sig mark. Og ég er algjörlega ósammála því að sýna eigi leikmönnum einhverja þolinmæði sem haga sér með þessum hætti,“ skrifar Sindri í pistil sínum á Vísir.is.
Sindri segir að rétt refsing fyrir Sigurð hefði verið ævilangt bann frá knattspyrnu. „Aga- og úrskurðarnefnd KSÍ gafst tækifæri til að sýna hversu grafalvarlegt málið er með þungu banni og eins árs bann er bara alls ekki nóg. Ævilangt bann hefði verið nær lagi en 3-4 ára bann líklega hæfilegt. Ég óttast að þessi vægi dómur bjóði velkomið það krabbamein sem veðmál og hagræðing úrslita er.
„Með þessu fordæmi er bara verið að segja: Ef svo ólíklega vill til að það komist upp um það að þú veðjir á eigin leiki, jafnvel margítrekað, þá kostar það þig bara níu mánuði frá fótbolta.“
