Ágúst sem tók við þjálfun meistaraflokks karla haustið 2021 stýrði liðinu í fimmta sæti á síðastliðnu tímabili en lætur nú af störfum.

Stjarnan ákveður að slíta samstarfinu eftir vona byrjun í bestu deildinni. Liðið er með einn sigur eftir sex umferðir og er í fallsæti. Jökull Elísabetarson sem var aðstoðarmaður hans tekur við liðinu.

„Það er aldrei auðveld ákvörðun að láta menn fara og sannarlega ekki í tilviki Gústa sem tók að sér að taka þátt í þeirri vegferð sem félagið hefur verið á þar sem miklar breytingar á leikmannahópnum hafa átt sér stað og uppbygging þar sem við höfum spilað á mörgum ungum leikmönnum. Sú staða sem er komin upp í byrjun móts þar sem liðið er í bullandi fallbaráttu er hins vegar ekki ásættanleg og því ákveðum við að stíga þetta skref núna. Ég vil þakka Gústa persónulega fyrir hans framlag og gott og heiðarlegt samstarf sem við höfum átt frá fyrsta degi og óska honum velfarnaðar í hverju því sem hann tekur sér fyrir hendur.“ Segir Helgi Hrannarr Jónsson formaður meistaraflokksráðs

„Mig langar að þakka Silfurskeiðinni og öllu Stjörnufólki fyrir minn tíma hjá félaginu og lít stoltur yfir farinn veg. Ég hef ekki fundið annað en stuðning allan þann tíma sem ég hef starfað hjá félaginu og er sannfærður um að liðið mun snúa við taflinu og stíga þau skref sem ég er viss um að leikmannahópurinn getur gert. Ennfremur vil ég þakka þjálfarateyminu og þeim sem standa i kringum liðið, en umgjörðin er í kringum liðið er algerlega einstök.“ segir Ágúst Gylfason

Jökull Elísabetarson tekur við þjálfun Stjörnunnar

Jökull Elísabetarson tekur nú við starfi þjálfara Stjörnunnar en Jökull hefur verið aðstoðarmaður Ágústs Gylfasonar frá því haustið 2021.

„Sú staða sem við erum í kallar á breytingar en þar sem félagið hefur haft óbilandi trú á þeirri vegferð sem liðið er á fannst okkur eðlilegt næsta skref að Jökull myndi taka við starfinu af Gústa enda alltaf erfiðar aðstæður sem skapast við brottför þjálfara og með þessu teljum við að við tryggjum ákveðna samfellu í því sem við höfum verið að gera. Við treystum Jökli vel til þess að snúa gengi liðsins við og munum hvetja Stjörnfólk til þess að halda áfram sínum frábæra stuðningi við liðið sem er í bullandi fallbaráttu eins og sakir standa og verkefni hans, leikmanna og annarra sem standa að liðinu er að snúa genginu við,“ segir í tilkynningu.