Í Víkinni unnu heimamenn 3-0 sannfærandi sigur á KR í Bestu deildinni í kvöld, heimamenn höfðu öll tök á leiknum en Logi Tómasson, Birnir Snær Ingason og Arnór Borg Guðjohnsen skoruðu mörkin.
Víkingar með fullt hús stiga eftir þrjá leiki og eru einir á toppnum í Bestu deildinni. „Frá upphafi sá maður að annað liðið var miklu klárara í þennan leik, það voru Víkingar. Besti kafli KR var undir lok fyrri hálfleiks,“ sagði Lárus Orri Sigurðsson í Stúkunni á Stöð2 Sport í kvöld.
„Víkingar voru bara grimmari, maður sá það langar leiðir að þeir vildu þetta og voru klárari en KR-ingar.“
Albert Brynjar Ingason var einnig gestur í Stúkunni og hann hefur mikla trú á Víkingum eftir öfluga byrjun. „Markatalan 7-0, fullorðins frammistöður. Fara í Garðabæinn og voru proffesional, æfingaleikur við Fylki í raun. Þetta var bara statement sigur gegn KR,“ sagði Albert.
Í stúkunni var rætt um yfirburði Víkings í kvöld en Rúnar Kristinsson þjálfari KR var ekki á því í viðtali eftir leikinn. Albert var ekki hrifin af viðtalinu við Rúnar.
„Hann er ekki að tala við leikmenn, heldur áhorfendur sem horfa á leikinn. Þetta er bara bullshit, þeir voru miklu lélegri,“ sagði Albert.
Lárus Orri tók þá til máls. „Rúnar er ekki vitlaus, hann veit að þeir áttu undir högg að sækja allan leikinn,“ sagði Lárus.
