Eftir risatíðindin fyrir helgi þess efnis að Gylfi Þór Sigurðsson sé nú laus allra mála velta margir því fyrir sér hvort að kappinn snúi aftur á knattspyrnuvöllinn. Tómas Þór Þórðarson, ritstjóri enska boltans á Símanum Sport, sagði frá áhugaverðum sögusögnum um framtíð Gylfa í boltanum í gær.

Gylfi var þann 16. júlí árið 2021 handtekinn á heimili sínu í Manchester, var honum gefið að sök að hafa brotið gegn ólögráða einstaklingi.

Eftir rúma 600 daga í farbanni frá Bretlandi er Gylfi frjáls ferða sinna og málið látið niður falla, taldi saksóknari engar líkur á sakfellingu í málinu.

Það er því lítið sem stöðvar Gylfa í að snúa aftur á knattspyrnuvöllinn, kjósi hann að gera svo.

„Þetta er algjört slúður og ég sel það ekki dýrara en ég keypti það. Ég heyrði það að hann væri búinn að vera að æfa með sínu gamla félagi Reading fyrir luktum dyrum og að það væri möguleki á að hann myndi spila þar ef þeir héldu sér uppi í Championship,“ sagði Tómas Þór í útvarpsþættinum Fótbolta.net á X-inu í gær.

Gylfi átti frábæru gengi að fagna með Reading á árum áður, en hann kom upp í gegnum unglingastarf félagsins. Tómasi Þór þykir þó ólíklegt að hann spili aftur í enska boltanum vegna hluta stuðningsmanna þar í landi.

„Ég trúi því alveg að hann sé búinn að vera að æfa þarna því hann þekkir mikið af fólki þarna og er eitt mesta stolt akademíu Reading, sem hefur nú skilað mörgum flottum leikmönnum.

En ég trúi því ekki fyrir mitt litla líf að hann muni spila annan fótboltaleik á Englandi út af því hversu ótrúlega mikið magn af vanvitum sækja íþróttakappleiki á Englandi.“