Þýski vefmiðillinn Bild heldur því fram að Julian Nagelsmann, sem var á dögunum rekinn úr starfi knattspyrnustjóra Bayern Munchen, muni ekki taka við stjórnartaumunum hjá enska úrvalsdeildarfélaginu Tottenham.
Nagelsmann var á dögunum, nokkuð óvænt, rekinn úr starfi knattspyrnustjóra Bayern Munchen. Fréttirnar bárust knattspyrnustjóranum unga frá fjölmiðlum en hann var þá staddur í fríi í Austurríki og hafði ekkert heyrt frá forráðamönnum Bayern Munchen sem höfðu nú þegar fundið eftirmann hans.
Svo fór að starfslok Nagelsmann voru staðfest eftir fund hans með forráðamönnum félagsins og inn var ráðinn Thomas Tuchel.
Á svipuðum tíma var greint frá því að Antonio Conte hefði verið sagt upp störfum sem knattspyrnustjóri enska úrvalsdeildarfélagsins Tottenham. Lögðu því margir tvo og tvo saman og fengu það út að Nagelsmann væri líklegur til þess að taka við Tottenham.
Nú heldur Bild því hins vegar fram að Nagelsmann muni ekki taka við Tottenham á næstunni. Hann ætli að taka sér hlé frá þjálfun og greina það í þaula hvað fór úrskeiðis hjá sér með Bayern Munchen.
Nagelsmann mun ekki greina þá hluti á atvinnuleysisbótum. Hann er á launaskrá hjá Bayern Munchen til ársins 2026, eða þegar að samningur hans við félagið átti að renna út.
Undir stjórn Nagelsmann varð Bayern þýskur meistari tímabilið 2021/2022 og þá vann liðið ofurbikarinn heima fyrir í tvígang. Á yfirstandandi tímabili situr Bayern Munchen í 2. sæti þýsku úrvalsdeildarinnar, einu stigi á eftir toppliði Borussia Dortmund og þá er félagið komið í átta liða úrslit Meistaradeildar Evrópu þar sem fram undan er einvígi við Manchester City.
