Það fór vond til­finning um eld­heitan stuðnings­mann New­cast­le United á dögunum þegar að hundur hans reif í sundur og át miða hans á lang­þráðan úr­slita­leik sem fé­lagið tekur þátt í þegar úr­slita­leikur enska deildar­bikarsins milli New­cast­le United og Manchester United fer fram á Wembl­ey.

Úr­slita­leikur liðanna fer fram á sunnu­daginn næst­komandi en greint er frá raunum stuðnings­mannsins á vef­síðu Foot­ball Joe.

Fyrr á þessum ör­laga­ríka degi hafði Alan Car­ling, stuðnings­maður New­cast­le United horft á lið sitt lúta í lægra haldi gegn Liver­pool á heima­velli í ensku úr­vals­deildinni. Þó svo að úr­slitin ein og sér hafi verið afar slæm fyrir Alan, bætti það ekki úr skák að einn af bestu leik­mönnum New­cast­le á tíma­bilinu, mark­vörðurinn Nick Pope var rekinn af velli með rautt spjald.

Dagur Alans átti hins vegar eftir að taka stefnu til hins enn verra þegar að hann sneri aftur til síns heima að kvöldi til þennan um­ræddan dag.

Við heim­komuna blasti ó­fögur sjón við Alan, hann sá hund sinn tæta í sundur miðann á úr­slita­leikinn í enska deildar­bikarnum en hann hafði borist í hús í gegnum bréfa­lúguna fyrr um daginn.

Reikna verður hins vegar með því, eins slæm og þessi saga lítur út fyrir að vera, að hægt verði að redda miðanum fyrir Alan.

Hann sá spaugi­legu hliðina á þessum mála­vendingum og setti inn færslu á sam­fé­lags­miðlum í gríni þar sem hann sagði frá raunum sínum og setti hund sinn á sölu.

Skjáskot