Íslenski landsliðsmiðvörðurinn Glódís Perla Viggósdóttir, leikmaður þýska stórliðsins Bayern Munchen er í skemmtilegu viðtali sem birtist á heimasíðu Bayern Munchen í dag. Í viðtalinu talar Glódis meðal annars um rætur sínar á Íslandi, gott hugarfar Íslendinga sem og þá skemmtilegu tilviljun að þrár íslenskar knattspyrnukonur eru nú á mála hjá Bayern Munchen.
Glódís segir það afskaplega gott að geta talað íslensku á nýjan leik hjá félagsliði sínu. Hún var á mála hjá sænska stórliðinu Rosengard í sex ár áður en hún gekk til liðs við Bayern og íslenska hennar farin að hraka.
„Ég talaði bara sænsku á tíma mínum hjá Rosengard og í hvert skipti sem ég kom heim til Íslands leiðréttu amma mín og afi mig ef ég notaði vitlausa málfræði. Ég notaði jafnvel orð sem voru ekki til í íslensku máli. Það er gott að geta talað íslensku daglega núna.“
Í viðtalinu er Glódís Perla einnig spurð út í það hvort hún viti hvaða Íslendingur hafi verið oftast ratað í fyrirsagnirnar hjá þýskum miðlum undanfarin ár. Glódís svarar um hæl „Rúrik“ og á þar við fyrrum atvinnu- og landsliðsmanninn í knattspyrnu, Rúrik Gíslason sem vann stóran sigur í Dansað með stjörnunum í Þýskalandi.
Glódís varpar síðan ljósi á áhugaverða tengingu sína við Rúrik frá fyrri tíð.
„Mamma hans var kennarinn minn,“ svarar hún hlægjandi við mikla undrun spyrilsins sem spyr þá á móti hvort það sé satt að á Íslandi þekkist allir.
„Já sér í lagi þegar kemur að fótbolta,“ svarar Glódís. „Heimurinn er lítill á Íslandi. Rúrik var á mála hjá sama félagi og ég, ég sá hann mjög oft en við töluðum aldrei saman.“
