Margrét Árnadóttir er gengin í raðir Parma á Ítalíu í kjölfar þess að samningur hennar við Þór/KA rann út.

Margrét er fædd 1999 og kom upp í meistaraflokk Þór/KA 2016 eftir að hafa verið þar í yngri flokkum.

Hún semur við Parma út þessa leiktíð með möguleika á framlengingu. Liðið er sem stendur á botni A-deildarinnar með sex stig eftir 12 leiki, hefur unnið einn leik og gert þrjú jafntefli, en næst fyrir ofan eru fjögur lið með tíu stig.

„Ég fékk símtal að kvöldi 28. desember um að liðið vildi bjóða mér samning og næsta morgun voru drögin að samningi komin. Ég hafði þá nánast bara dag í að gefa svar og ákvað á endanum að segja já og næsta morgun var kominn samningur,“ segir hún Margrét við heimasíðu Þórs/KA.

„Mig hefur lengi langað að fara út í atvinnumennsku og hefur alltaf langað að prófa að flytja á meginland Evrópu. Þannig að eftir þetta tímabil ákvað ég aðeins að fara að skoða hvaða möguleika ég ætti.“

Juventus-goðsögnin Gianluigi Buffon spilar með karlaliði Parma og birtist mynd af honum og Margréti eftir skipti hennar frá Íslandi.