Íslenska kvennalandsliðið mætir Hvíta-Rússlandi í gífurlega mikilvægum leik á föstudag. Leikurinn er liður í undankeppni HM, sem fram fer á næsta ári. Sara Björk Gunnarsdóttir, fyrirliði, segir liðið vel upp lagt fyrir leikinn.
Ísland er í öðru sæti undanriðilsins, tveimur stigum á eftir Hollandi. Stelpurnar okkar eiga þó eftir að leika tvo leiki en Holland aðeins einn, sá er einmitt gegn Íslandi.
Vinni Ísland Hvíta-Rússland er liðið í kjörstöðu upp á að komast beint á lokakeppni HM fyrir leikinn gegn Hollandi ytra. Liðið sem hafnar í öðru sæti riðilsins fer í umspil.
Þó stórleikurinn við Holland sé handan við hornið er öll einbeiting á verkefnið gegn Hvíta-Rússlandi. „Við vitum alveg hversu mikilvægt það er að ná góðum úrslitum þar. Við megum ekki fara fram úr okkur heldur bara að vera í núinu og hugsa um næsta leik,“ segir Sara.
Ísland komst ekki upp úr riðlinum er það tók þátt í lokakeppni EM fyrr í sumar. Það er þó að baki. „Við erum vanar því að spila leiki, vinna eða tapa, það er alltaf bara næsti leikur, næsta mót og hitt sett til hliðar.“
Leikurinn gegn Hvíta-Rússlandi fer fram hér heima en leikurinn gegn Hollandi ytra. Sara vonast til að sjá fólk fjölmenna í Laugardalinn á föstudag. „Ég vona að það sé mikill áhugi eftir EM. Það var allavega mikill áhugi í kringum það, fengum frábæran stuðning þar. Vonandi mæta sem flestir á völlinn.“
Landsliðsfyrirliðinn gekk í raðir Juventus frá Lyon í sumar. Hún hafði náð frábærum árangri með franska félaginu og tvisvar sinnum orðið Evrópumeistari.
„Það er búið að vera frábært síðan ég kom, aðeins erfiðara að koma mér fyrir en fótboltalega séð er allt í toppstandi,“ segir Sara.
Nánar er rætt við Söru í spilaranum hér að neðan.
