Hlín Leifsdóttir hefur verið að gera það gott sem óperusöngkona undanfarin ár, og söng meðal annars nýlega hlutverk Næturdrottningarinnar í Töfraflautu Mozarts í Aþenu, en hún fæst í auknum mæli einnig við samtímatónlist. Hún frumflutti nýverið tónaljóð sín og tónskáldsins Vasilis Chountas af enskri útgáfu plötunnar Andrými, sem gefin var út á dögunum af Institute for Experimental Arts fyrir fullu húsi í Aþenu við mjög góðar undirtektir. Gagnrýnendur fóru lofsamlegum orðum um viðburðinn og  “einstaklega blæbrigðaríka” og “töfrandi” rödd Hlínar. Tvíeykið naut liðsauka myndlistakonunnar María Salouvardou sem flutti gjörning innblásinn af ljóði Hlínar. Í umfjöllun gríska tímaritsins Oowlr er viðburðinum lýst sem upplifun fullri af dulúð þar sem listamennirnir hafi náð að birta áhorfendum “eitthvað sem nálgast dýpsta kjarna tilfinningatengsla.”

Hlín flutti síðan tónaljóðin á listviðburði í Berlín, þar sem meðal annars var sýndur skúlptúr eftir myndlistakonuna Salouvardou tileinkaður ljóði Hlínar og stuttmynd sem listakonan gerði við ljóð Hlínar í samstarfi við gríska leikstjórann Alkistis Kafetzi.

Viðburðurinn var í Gewölbekeller, víðáttumiklu rými djúpt ofan í jörðu, þar var áður bjórkjallari sem var tekinn undir hergagnaframleiðslu á dögum Þriðja ríkisins, en er helgaður listviðburðum í dag. “Þetta var ógleymanleg stund,” segir Hlín. “Þarna var ég að syngja umkringd listaverkum Maríu Salouvardou, sem er listakona sem fæst mikið við spurninguna um tjáningarfrelsi, sem er það fyrsta sem hverfur á stríðstímum, í fyrstu hægt og rólega, eiginlega án þess að menn taki eftir því, en loks standa menn uppi raddlausir eftir því sem ófriðurinn eykst. Þetta rými hefur lifað mörg líf, en þarna er einstaklega góður hljómburður sem var algjörlega vannýttur á meðan þarna var verið að framleiða drápstól. Og þarna vorum við María, langt undir jörðinni, að flytja ljóð um að brjótast undan þöggun, og þá er eins og þúsund raddir, greyptar í veggina sem hafa þagað alltof lengi, taki undir.”

Hlín hefur verið boðið að koma aftur til Berlínar að flytja tónaljóð sín bráðlega, og einnig á bókmenntahátíð í Kýpur.