„Þetta voru stærstu mistökin í sögu götublaða,“ sagði Victoria Newton, ritstjóri The Sun, nýlega á ráðstefnu í Lundúnum að sögn Press Gazette.
Harmleikurinn á Hillsborough átti sér stað 15. apríl 1989 þegar Liverpool og Notthingham Forest mættust í undanúrslitum FA-bikarsins.
Leikurinn fór ekki fram því mikil ringulreið varð á þeim hluta áhorfendapallanna þar sem aðdáendur Liverpool voru. 96 manns létust þennan dag og einn til viðbótar lést síðar af völdum áverka sinna.
Nokkrum dögum síðar birti The Sun forsíðu með fyrirsögninni „Sannleikurinn“. Í umfjöllun blaðsins var stuðningsmönnum Liverpool kennt um hversu hörmulega málin þróuðust þennan dag. Þeir voru einnig sakaðir um að hafa stolið frá fólki sem var að kremjast til bana. Blaðið hélt því einnig fram að stuðningsmenn Liverpool hefðu kastað af sér vatni á lögreglumenn og hindrað þá og aðra viðbragðsaðila í að veita slösuðum fyrstu hjálp.
Þetta var haft eftir lögreglumanni sem vildi leyna því að yfirvöld höfðu brugðist. Hann laug því til um atburðarásina. Niðurstaða óháðrar rannsóknarnefndar, sem kom út síðar, var að stuðningsmenn Liverpool hefðu ekki átt neina sök á því sem gerðist. Sökin var yfirvalda og vegna öryggisráðstafana á vellinum.
Þáverandi aðalritstjóri The Sun baðst afsökunar á þessari frétt 2012. En það hafði engin áhrif á íbúa í Liverpool sem byrjuðu að sniðganga The Sun eftir þessa frétt og það gera þeir enn.
Victoria Newham er sjálf frá Liverpool og ólst upp við að borgarbúar sniðgangi The Sun. Fólk kaupir ekki blaðið og það er fjarlægt úr hillum verslana ef það sést þar. Margir vilja heldur ekki skrifa nafn þess eða segja.
