Íþróttaárið var gert upp í Íþróttavikunni með Benna Bó þetta skiptið. Íþróttastjóri Torgs, Hörður Snævar Jónsson, mætti í settið ásamt þeim Val Gunnarssyni, Braga Þórðarsyni og Tómasi Þór Þórðarsyni.

Það var meðal annars farið yfir Íslandsmótið í knattspyrnu og þá aðallega nýtt fyrirkomulag Bestu deildar karla.

„Blikar gera þetta nýja fyrirkomulag óspennandi á fyrsta tímabili. Eftir 15-16 umferðir var þetta í raun ekki spurning. Þetta er mjög vel gert hjá Óskari. Þeir eru með mjög gott lið en hann hefur haldið þeim á tánum í þrjú ár,“ segir Hörður um Íslandsmeistara Breiðabliks.

„Það er ekki svo algengt að Íslandsmeistaratitillinn sé varinn en þeir eru heldur betur með lið í það. Þetta er fullkominn hópur meira og minna, fyrir Ísland,“ segir Tómas.

Valur segir að engin keppni væri um titilinn hér heima ef ekki væri fyrir Arnar Gunnlaugsson. „Ég þakka guði fyrir það að Arnar Gunnlaugsson sé að stýra Víkingi.“

Hann var þó ekki hrifinn af nýju fyrirkomulagi.

„Mér fannst þetta glatað og þetta fyrirkomulag frá byrjun gjörsamlega fáránlegt. Það tengist ekkert að við höfum fallið,“ segir Valur og bendir á að það hafi verið athugavert að Leiknir, sem hafnaði í tíunda sæti, hafi fengið útileik gegn FH sem hafnaði í ellefta sæti þegar úrslitakeppni hófst.

Hörður var nokkuð sáttur með fyrirkomulagið en skildi punkt Vals. „Þetta er auðvitað mjög ósanngjörn niðurröðun fyrir liðið í tíunda sæti.“

„Það var alltaf vitað að þetta yrði lærdómsár,“ segir Tómas.

Umræðan er hér að neðan.