Stjórn knattspyrnudeildar KR hefur beðið Kjartan Henry Finnbogason formlega afsökunar á vinnubrögðum félagsins.

Samningi Kjartans var sagt upp á dögunum en framherjinn knái var óhress með hvernig var staðið að málum.

„Stjórn knattspyrnudeildar KR vill enn fremur árétta að Kjartan Henry hefur aldrei nokkurn tímann gerst brotlegur við reglur félagsins eða viðhaft einhvers konar háttsemi sem felur í sér agabrot af einhverju tagi,“ segir í yfirlýsingu stjórnar knattspyrnudeildar.

Reikna má að stjórnin sé þarna að svara fyrir ummæli Rúnars Kristinssonar, þjálfara, sem sagði Kjartan ekki hafa hagað sér almennilega.

Meira:
Einkaviðtal við Kjartan Henry: Stóð á gati eftir ummæli Rúnars – „Uppsögnin sem slík kom mér ekki í opna skjöldu

Yfirlýsing frá knattspyrnudeild KR
Að undanförnu hafa samningsmál Kjartans Henry Finnbogasonar, leikmanns meistaraflokks karla í knattspyrnu og félagsins verið til umfjöllunar í fjölmiðlum. Stjórn knattspyrnudeildar KR harmar þau vinnubrögð sem viðhöfð voru í tengslum við uppsögn á samningi Kjartans.
Stjórn knattspyrnudeildar KR vill enn fremur árétta að Kjartan Henry hefur aldrei nokkurn tímann gerst brotlegur við reglur félagsins eða viðhaft einhvers konar háttsemi sem felur í sér agabrot af einhverju tagi.
Kjartan er borinn og barnfæddur KR-ingur sem lék upp alla yngri flokka félagsins. Kjartan hefur gegnt lykilhlutverki í meistaraflokki félagsins á að baki 242 mótsleiki með KR og skorað í þeim 110 mörk. Þá hefur Kjartan unnið 6 titla og er markahæsti leikmaður félagsins í Evrópu frá upphafi. Við KR-ingar þökkum Kjartani kærlega fyrir hans framlag til félagsins og óskum honum velfarnaðar.
f.h. stjórnar
Páll Kristjánsson, formaður.