West Ham vill fá 200 milljónir punda fyrir miðjumanninn Declan Rice. Upphæðin samsvarar ríflega 35 milljörðum íslenskra króna. Þetta segir á vef talkSPORT.

Rice er aðeins 22 ára gamall. Hann hefur verið lykilmaður á miðju West Ham undanfarin tímabil.

Stórlið eins og Chelsea og Manchester United hafa lengi verið orðuð við enska landsliðsmanninn.

West Ham hefur þó engan áhuga á að selja Rice. Það má því ætla að verðmiðinn sé til þess að fæla félög frá. Litlar líkur eru á að eitthvað félag reiði fram 200 milljónir punda fyrir Rice.

Rice var í unglingastarfi Chelsea áður en hann fór til West Ham árið 2013, 13 ára gamall.

Hann á að baki 27 landsleiki fyrir Englands hönd. Í þeim hefur Rice skorað tvö mörk.