Rússland fær ekki að taka þátt í undankeppni Evrópumótsins 2024 og á því ekki möguleika á að komast á lokamótið.
Landslið Rússlands eru í banni frá alþjóðlegum íþróttakeppnum sökum innrásar landsins í Úkraínu.
Dregið verður í undanriðla fyrir EM í Þýskalandi 2024 í næsta mánuði. Drátturinn fer fram í Frankfurt. Öll undankeppnin verður svo leikin á næsta ári.
Rússar áfrýjuðu banni sínu í júlí en í gær var staðfest að henni hafi verið hafnað. Rússland fær ekki að taka þátt.
Hins vegar fær Hvíta-Rússland, sem hefur verið hliðhollt Rússum í innrásinni í Úkraínu, að vera í pottinum þegar dregið verður í undanriðla í Frankfurt.
Íslenska karlalandsliðið verður að sjálfsögðu á meðal þátttökuþjóða í undankeppninni. Liðið freistar þess að komast á sitt annað Evrópumót í sögunni.
