Sir Alex Ferguson fyrrum stjóri Manchester United var kallaður til sem vitni í máli Ryan Giggs þar sem hann er sakaður um gróft ofbeldi gegn fyrrum unnustu sinni.

Réttarhöld í máli Ryan Giggs halda áfram. Þessi fyrrum leikmaður Manchester United er sakaður um margs konar ofbeldi gegn fyrrum kærustu sinni, Kate Greville. Ofbeldið er af andlegum og líkamlegum toga.

Ferguson var kallaður til leiks og var spurður út í Giggs sem persónu en Kate segir hann hafa beitt sig grófu líkamlegu og andlegu ofbeldi.

„Við fengum mikla athygli frá fjölmiðlum þegar hann var ungur drengur,“ sagði Ferguson í vitnaleiðslum í dag.

„Ég tjáði mömmu hans að ég myndi sjá um hann, við urðum að fara vel með hann.“

„Hann var með frábæra skapgerð, hann var besta fordæmið sem ég hafði fyrir alla hjá klúbbnum,“ sagði Ferguson og sagði Giggs aldrei hafa mist stjórn á skapi sínu.

„Ryan var rólegur ungur drengur, hann sat og hlustaði á það sem ég sagði.“