Samkvæmt enskum götublöðum er stríð innan herbúða Manchester United vegna Cristiano Ronaldo.
Ronaldo hefur verið orðaður burt frá United í allt sumar. Portúgalinn vill spila í Meistaradeild Evrópu, eitthvað sem liðið getur ekki boðið honum eftir vonbrigði á síðustu leiktíð.
Ronaldo hefur verið orðaður við fjölda stórliða um allan heim en ekkert þeirra virðist til í að taka sénsinn á honum.
Erik ten Hag, stjóri liðsins, er pirraður á gangi mála, þar sem Ronaldo virðist dreifa slæmu andrúmslofti um búningsklefann á Old Trafford. Leikmannahópurinn er sagður tvískiptur vegna Portúgalans.
Hins vegar vill eigandi United, Joel Glazer, alls ekki selja Ronaldo vegna þeirra markaðstækifæra sem hann býður upp á. Ronaldo er auðvitað ein stærsta knattspyrnustjarna heims.
Þá eru stjórnarformaðurinn, Richard Arnold, og yfirmaður fótboltamála, John Murtough ósammála um hvað eigi að gera með Ronaldo.
United hefur byrjað tímabilið afleitlega. Liðið tapaði 1-2 gegn Brighton í fyrstu umferð og um helgina tapaði það 4-0 gegn Brentford.
Ronaldo byrjaði leikinn gegn Brentford en kom inn af bekknum gegn Brighton.
