Sara Björk Gunnarsdóttir, landsliðsfyrirliði, lék með liðinu í kvöld sem spilaði við Belgíu í lokakeppni EM.

Ísland gerði 1-1 jafntefli við Belga í opnunarleiknum sem er smá svekkjandi en liðið hafði möguleika á öllum þremur stigum.

Ísland er í erfiðum riðli með Belgum, Frökkum og Ítölum og hefði verið kjörið að fá þrjú stig í kvöld.

Sara ræddi við blaðamenn eftir leikinn í kvöld.

,,Við þurftum mark er það ekki? Við fengum færin og vorum að búa til. Við fengum mikið af föstum leikatriðum og þurfum að nýta þau betur og gera betur á síðasta þriðjungi,“ sagði Sara.

,,Við vorum að spila vel á köflum, aðrir kaflar kannski ekki eins góðir en svo fannst mér pressan hjá okkur í fyrri hálfleik, við lokuðum á þær. Þær eru vel spilandi lið en við lokuðum á öll svæði sem við vissum að þær myndu spila í. Vörnin stóð sig frábærlega.“

,,Við þurfum að halda áfram og halda áfram góðri pressu. Við þurfum að finna gagnstætt svæði sem var oft á tíðum opið. Þegar við skorum þá kannski vorum við meira til baka og smá passívar.“

Hitinn var mikill í Manchester í dag en Sara segir að það hafi ekki haft of slæm áhrif.

,,Skrokkurinn er alltaf að koma mér á óvart á hverjum einasta degi. Mér leið bara vel, það var heitt og ég var alltaf að stela vatni af markmanninum. Völlurinn var frábær og topp aðstæður. Þetta er enginn heimsendir og við tökum næsta leik.“