Mohamed Salah, leikmaður Liverpool, var víst reiðubúinn að ganga í raðir Chelsea áður en hann skrifaði undir nýjan samning við félagið.

Þetta herma heimildir enska götublaðsins Sun en Salah skrifaði í vikunni undir nýjan risasamning við Liverpool.

Þessi þrítugi leikmaður er launahæsti leikmaður Liverpool frá upphafi og fær um 350 þúsund pund á viku.

Samkvæmt Sun var umboðsmaður Salah að vinna í endurkomu á Stamford Bridge áður en samningar á milli aðilana náðust loksins.

Fyrr í sumar var greint frá því að Liverpool væri tilbúið að hleypa Salah burt fyrir 60 milljónir frekar en að missa hann frítt 2023.

Salah er fyrrum leikmaður Chelsea en hann fékk aldrei alvöru tækifæri til að sanna sig þar og fór síðar til Ítalíu og svo til Liverpool.