Arsenal reyndi að fá Luis Suarez í sínar raðir tímabilið 2013/2014 er Arsene Wenger var stjóri liðsins. Suarez spilaði þá fyrir Liverpool og var markavél á Anfield.

Það var frægt þegar Arsenal reyndi að virkja kaupákvæði í samningi Suarez sem var sagt hljóma upp á 40 milljónir punda.

Það var hins vegar bull í umboðsmanni Úrúgvæans en Arsenal bauð upphæðina í leikmanninn sem skilaði engum árangri.

Wenger hefur nú tjáð sig um þetta fíaskó sem átti sér stað en umboðsmaður Suarez var í raun ekki alveg með hlutina á hreinu.

,,Árið 2014 þá reyndum við að semja við Suarez. Við vorum búnir að ná samkomulagi við hann og umboðsmann hans,“ sagði Wenger.

,,Umboðsmaðurinn sagði að það væri klásúla í samningi Suarez sem leyfði honum að fara fyrir 40 milljónir punda, að Liverpool þyrfti að sleppa honum.“

,,Ég fann hins vegar út að þessi klásúla var aldrei til. Til að athuga hvort þetta væri rétt þá buðum við 40 milljónir og eitt pund sem kann að hljóma fáránlegt.“

,,Liverpool vildi ekki selja hann og þeir gátu haldið honum og það var á sama tíma tilboð á leiðinni frá Barcelona.“