Á morgun kemur út heimildamynd um franska miðjumanninn Paul Pogba. Verður hún aðgengileg á Amazon.

Nokkur brot hafa verið birt úr myndinni nú þegar. Til að mynda var eitt samtal á milli Pogba og Mino Raiola, þá umboðsmanns hans, birt í myndinni.

Þeir ræddu þá nýtt samningsboð Manchester United til Pogba á síðustu leiktíð. Leikmaðurinn hefur nú yfirgefið félagið frítt.

„Lagði Manchester United fram annað tilboð?“ spurði Pogba.

„Já, þeir vilja algjörlega að þú verðir áfram. Mér finnst tilboðið ekki sýna það. Ég sagði þeim að ef þeir vildu halda þér gætu þeir ekki boðið þetta. Ég mun láta þá skilja að ef þeir vilja í alvöru halda þér og byggja liðið upp í kringum þig þá þurfi þeir að leggja alvöru peninga á borðið,“ svaraði Raiola þá. Tilboðið hljóðaði upp á 290 þúsund pund.

Pogba virtist gefa lítið fyrir boð Man Utd. „Þeir eru að blekkja. Hvernig geturðu sagt leikmanni að þú viljir halda honum og boðið ekkert. Ég hef aldrei heyrt um það.“