Tveimur leikjum var að ljúka í Bestu deild kvenna. Þór/KA sigraði Val óvænt og Selfyssingar höfðu betur gegn ÍBV.
Þór/KA tók á móti Íslandsmeisturum Vals í Boganum. Heimakonur í Þór/KA byrjuðu leikinn af krafti og kom Sandra María Jessen þeim yfir strax á 6. mínútu. Gestirnir sóttu meira eftir því sem leið á seinni hálfleikinn og hafði Valur öll völd á vellinum. Þær náðu þó ekki að jafna leikinn í fyrri hálfleik og leiddi Þór/KA með einu marki er flautað var til hálfleiks.
Sóknarþungi Vals skilaði sér loks í seinni hálfleik er Elín Metta Jensen jafnaði metin á 64. mínútu. Þrátt fyrir að Valur hafi verið töluvert sterkara liðið þá kom Margrét Árnadóttir Þór/KA aftur yfir á 75. mínútu eftir stungusendingu inn fyrir vörn Vals gegn gangi leiksins. Sandra Sigurðardóttir varði fyrsta skot Margrétar en Margrét náði boltanum aftur og kláraði í netið. Gestirnir fengu nokkur ágætis færi undir lok leiks og sóttu án afláts en Harpa Jóhannsdóttir var frábær í markinu. 2-1 sigur heimakvenna reyndist niðurstaðan í kvöld og þær taka stigin þrjú.
Þór/KA 2 – 1 Valur
1-0 Sandra María Jessen (´6)
1-1 Elín Metta Jensen (´64)
2-1 Margrét Árnadóttir (´75)
Á sama tíma tók ÍBV á móti Selfyssingum á Hásteinsvelli. Fyrri hálfleikur liðanna var rólegur og lítið um opin færi. Markalaust var er flautað var til hálfleiks.
Brenna Lovera kom Selfyssingum yfir á 55. mínútu en þetta var hennar þriðja mark í sumar. Það reyndist eina mark leiksins og Selfyssingar tóku stigin þrjú og fara á topp Bestu deildarinnar.
ÍBV 0 – 1 Selfoss
0-1 Brenna Lovera (´55)
