Lögreglan í Manchester er ekki búin að taka ákvörðun um hvort ákæra eigi í máli knattspyrnumannsins Gylfa Þórs Sigurðssonar sem sakaður er um að hafa brotið kynferðislega á ólögráða einstaklingi. Þetta staðfestir Kate King, fjölmiðlafulltrúi lögreglunnar í Manchester í samtali við Fréttablaðið.
„Það er ekkert að frétta okkar megin þar sem við erum enn að bíða eftir upplýsingum sjálf,“ sagði Kate King, fjölmiðlafulltrúi lögreglunnar í Manchester í samtali við Fréttablaðið.
„Við erum enn að bíða eftir dómstólnum. Við höfum ekki enn heyrt neitt frá þeim,“ bætti hún við.
Gylfi Þór var handtekinn um miðjan júlí á síðasta ári og grunaður um kynferðisbrot gegn ólögráða einstaklingi. Samkvæmt miðlum á Bretlandseyjum hefur Gylfi Þór harðneitað sök í málinu.
Skömmu eftir handtökuna var Gylfi látinn laus gegn tryggingu og hefur verið laus síðan þá.
