KR vann 6-0 stórsigur á Víking R. í Vesturbænum í Lengjudeild kvenna í gær en Katrín Jakobsdóttir, forsætisráðherra var á meðal þeirra sem mættu á völlinn. Það kemur fram á Fótbolta.net.

Eins og knattspyrnuáhugafólk veit er grímuskylda á knattspyrnuvöllum landsins, eitthvað sem ekki tíðkast í öðrum löndum. Katrín gleymdi þeim reglum sem ríkja hér á landi.

Þær Aiden Hogan Keane, Unnur Elva Traustadóttir, Kristín Sverrisdóttir og Bergdís Fanney Einarsdóttir höfðu komið KR-ingum í 4-0 forystu í fyrri hálfleik. Sandra Dögg Bjarnadóttir og Karítas Ingvadóttir bættu við fimmta og sjötta markinu á 65. og 85 mínútu. KR er í 3. sæti deildarinnar með 33 stig eftir 15 leiki, tveimur stigum frá FH í efsta sæti. Víkingur R. er í 4. sæti með 22 stig.

Katrín sem fer fyrir ríkisstjórninni sem setur hömlur á líf fólks vegna COVID 19 faraldursins gleymdi eigin reglum þegar hún mætti á völlinn í gær. „Forsætisráðherrann Katrín Jakobsdóttir átti heldur ekki góðan dag þar sem hún mætti á völlinn en gleymdi grímunni,“ segir í umfjöllun Fótbolta.net um Katrínu.

Hafliði Breiðfjörð framkvæmdarstjóri fyrirtækisins ræðir málið á Twitter og segir. „Þegar reglurnar gilda um suma..“

Þegar reglurnar gilda um suma… #fotboltinet pic.twitter.com/t2hb5GLpHr

— Hafliði Breiðfjörð (@haflidib) August 19, 2021

Kolbrún Bergþórsdóttir gerði grímuskyldu á knattspyrnuvöllum að umtalsefni í leiðara Fréttablaðsins í gær. „Meðan grímuskylda er afnumin hjá öðrum Norðurlandaþjóðum er henni viðhaldið hér á landi. Á fótboltavöllum koma þar þúsundir saman án grímu meðan hér á landi eru fjöldatakmarkanir og grímuskylda undir berum himni. Hér á landi er ætlast til að fólk sitji með grímur í leikhúsi og á tónleikum án hlés. Hver er eiginlega skemmtunin í því að sitja í sal með fólki þar sem allir eru með grímu og líta út eins og zombíur? Samt eru einhverjir sem láta bjóða sér þetta. Aðrir kjósa fremur að sitja heima og dunda við að skipuleggja menningarferðir eða ferð á knattspyrnuleik til erlendra borga þar sem frelsið býr,“ skrifaði Kolbrún.