Massimiliano Allegri, þjálfari Juventus sagði í viðtali eftir æfingaleik gegn Monza í gær að Aaron Ramsey geti spilað fyrir framan vörn liðsins. Aaron Ramsey byrjaði leikinn á miðjunni í 4-3-3 leikkerfi og stóð sig með prýði.

„Ramsey spilaði vel fyrir framan vörnina og hann getur gert góða hluti í þeirri stöðu,“ sagði Ítalinn eftir leikinn en Juventus vann B-deildarlið Monza 2-1. „Ef að Ramsey trúir því að hann geti spilað þá stöðu getur hann orðið mjög góður. Hann stígur inn í sendingar, og ég sagði honum í gríni að hann þurfi að hlaupa minna í þessari stöðu.“

Juventus hefur verið orðað við Manuel Locatelli, leikmann Sassuolo sem að spilar svipaða stöðu en hann er skapandi miðjumaður sem er góður í því að stjórna tempói leikja í 4-3-3 leikkerfi. Ef að Juventus tekst ekki að klófesta hann er Ramsey annar möguleiki á miðjunni.