Leikmaður í ensku úrvalsdeildinni  er grunaður um kynferðisbrot gegn barni. Þetta kemur fram í frétt á vef The Sun.

Samkvæmt fréttinni var húsleit gerð á heimili leikmannsins í þessum mánuði. Síðastliðinn föstudag var hann tekinn til yfirheyrslu hjá lögreglu en látinn laus að henni lokinni.

Í fréttinni er sagt að hald hafi verið lagt á marga muni í húsleitinni og lögregla hafi lagt spurningar fyrir leikmanninn í tengslum við meint alvarleg afbrot.

Sagt er að málið sé reiðarslag fyrir liðin í ensku úrvalsdeildinni en keppnistímabilið hefst eftir nokkrar vikur.

Leikmaðurinn hefur verið leystur frá störfum frá félagi sínu, en hvorki hann né félagið eru nafngreind í fréttinni.

Í frétt Mirror um málið kemur fram að leikmaðurinn er 31 árs gamall.