Jim Stjerne Hansen, varaformaður aganefndar UEFA, segir að margar ástæður séu fyrir því af hverju leikur Dana og Finna hafi þurft að halda áfram í gær, eða í hádeginu í dag.
Eins og flestir, ef ekki allir, vita þá hneig Christian Eriksen niður í leik með danska landsliðinu gegn Finnlandi á Evrópumótinu í gær. Hann andaði hvorki né var með púls um tíma og þurfti læknalið að beita hjartahnoði. Til allrar hamingju komst Eriksen þó aftur til meðvitundar og gat bæði talað og andað eftir að hafa verið fluttur á sjúkrahús.
Leiknum var svo haldið áfram síðar um kvöldið. Það vakti upp misjöfn viðbrögð. Leikmen hefðu getað valið það að spila í hádeginu í dag en töldu betra að klára leikinn í gærkvöldi.
,,Í fyrsta lagi þurfa liðin að halda áfram í næsta leik. Hann er yfirleitt nokkrum dögum síðar. Það er því ekki hægt að færa leiki fram um marga daga,“ sagði Hansen um það af hverju leikurinn hélt áfram svo fljótt.
,,Það þarf líka að taka áhorfendur inn í myndina. Í þessu tilfelli eru Finnarnir á leið til Sankti Pétursborgar til þess að mæta Rússum á miðvikudag. Þeir hafa ákveðið að fara frá Danmörku í dag svo það hefði sett þá í erfiða stöðu að fresta leiknum.“
,,Það er svo margt sem þarf að hafa í huga svo það er erfitt að færa leiki fram. Það var hægt að færa hann þar til í hádeginu í dag. Þetta er mótsfyrirkomulagið.“
Sjálfur hafði Hansen ekkert með ákvarðanirnar. Hann greindi aðeins frá þessu á blaðamannafundi í Danmörku. Þess má geta að hann er danskur.
