Manchester City tók á móti Leeds United í fyrsta leik dagsins í ensku úrvalsdeildinni. Þrátt fyrir að hafa leikið allan seinni hálfleikinn manni færri tókst gestunum að vinna frábæran sigur á toppliðinu.

Leikurinn fór nokkuð rólega af stað. City, sem tefldi fram töluvert breyttu byrjunarliði frá síðasta leik, áttu nokkur fín færi á fyrsta hálftímanum eða svo þrátt fyrir að Leeds hafi átt fyrsta marktækifæri leiksins.

Það dró þó til tíðinda á 42.mínútu þegar Stuart Dallas kom gestunum yfir með góðu skoti eftir undirbúning frá Patrick Bamford. Það stefndi í að Leeds-liðið færi ansi sátt inn í leikhléið en í uppbótartíma fékk Liam Cooper, fyrirliði liðsins, rautt spjald eftir tæklingu á Gabriel Jesus. Andre Marriner notaðist við myndbandsdómgæslu til að komast að ákvörðun sinni. Staðan í hálfleik 0-1.

Það var mikill hiti í upphafi seinni hálfleiksins. City, nú manni fleiri, fengu nokkur færi til að jafna áður en Ferran Torres tókst það svo á 76. mínútu.

Manni færri tókst Leeds þó að skora sigurmarkið í uppbótartíma. Dallas, sem hefur átt frábært tímabil, var þar aftur á ferðinni. Þvílík dramatík í Manchester!

Leeds eru eftir leikinn í níunda sæti með 45 stig. City er enn langefst í deildinni.