Knattspyrnustjarna á Englandi er háð svefntöflum og notar þær ítrekað með áfengi, frá þessu greinir enska blaðið The Sun og hefur eftir heimildarmanni sínum. Ekki er greint frá nafni mannsins.

Þessi stjarna í ensku úrvalsdeildinni er frá Englandi en hann kaupir Zopiclone svefntöflur á svörtum markaði, í frétt um þetta segir að hann taki töflurnar daglega. Vinir mannsins hafa verulegar áhyggjur af knattspyrnustjörnunni og hafa ráðlagt honum að leita sér hjálpar, áður en hann sturtar ferli sínum í klósettið.

Maðurinn sem er sagður eiga í vandræðum innan vallar vegna lífsstílsins utan vallar, segir vinum sínum að pillurnar komi ekki fram á lyfjaprófi deildarinnar. Hann komist í vímu af þeim þegar hann neytir áfengis.

„Ég horfði á hann gleypa Zopiclone á meðan hann var að drekka. Hann henti tómum pakka af þessum pillum á gólfið, það sáu þetta allir,“ segir heimildarmaður The Sun, hann hefur haldið nokkur partý nú þegar útgöngubann er í Bretlandi.

„Ég trúði þessu ekki og snéri mér að vini mínum sem spilar með honum. Vinir hans og liðsfélagar hafa verulegar áhyggjur, hann er háður þessum töflum.“

Heimildarmaðurinn segir að töflurnar og áfengi komi leikmanninum í vímu. „Honum líður vel með sjálfan sig, næsta dag er hann orkulaus og getur ekki staðið sig á æfingu. Hann tekur töflurnar á hverjum degi og er ekki á góðum stað.“

Heimildarmaðurinn segir frá gleðskap sem hann fór í hjá þessum umrædda leikmanni, símar voru teknir af öllum áður gengið var inn í húsið og var ekki hægt að fá hann fyrr en gleðskapurinn var á enda.