Newcastle er sagt vera að undirbúa tilboð í Eden Hazard, vængmann Real Madrid. Þetta segir í frétt El Nacional.

Belginn þrítugi kom til Real Madrid sumarið 2019 frá Chelsea á um 100 milljónir punda. Hann hefur hins vegar valdið miklum vonbrigðum í spænsku höfuðborginni.

Hazard hefur verið mikið frá vegna meiðsla og ekki sýnt sínar bestu hliðar þess á milli.

Newcastle á nóg af peningum eftir að opinber fjárfestingasjóður Sádí-Arabíu keypti liðið í haust. Félagið er sagt vera að undirbúa 34 milljóna punda tilboð í Hazard.

Newcastle er í bullandi fallbaráttu í ensku úrvalsdeildinni. Liðið hefur ekki enn unnið leik og er á botni deildarinnar.

Félagaskiptaglugginn opnar í janúar. Verður þetta fyrsti glugginn eftir yfirtöku Sáda á félaginu. Það má því búast við að töluverðum fjárhæðum verði eytt í leikmenn til að koma í veg fyrir fall hjá þessu ríkasta knattspyrnufélagi heims.