Arnar Þór Viðarsson, þjálfari karlalandsliðs Íslands, var ánægður með frammistöðu liðsins í markalausu jafntefli gegn Rúmeníu í undankeppni HM 2022 í kvöld.
Ísland hefði vel getað skorað í leiknum en tókst ekki að nýta færin. Þá spilaði liðið góðan varnarleik.
,,Við lögðum upp með það að halda hreinu. Það er eitt af þessu grunnatriðum sem við erum að vinna í, það tókst, ánægður með það,“ sagði Arnar við RÚV eftir leik.
,,Við vorum líka mjög ánægðir með þau færi sem við sköpuðum okkur og möguleika á að skapa enn fleiri færi. Þetta er allt í rétta átt í dag.
Ísland er í fimmta sæti undanriðilsins. Síðasti leikurinn í undankepnninni verður gegn Norður-Makedóníu á sunnudag.
Norður-Makedónía er í öðru sæti, umspilssæti, stigi á undan Rúmenum. Íslendingar gerðu Rúmenum því mikinn ógreiða með úrslitum kvöldsins. Ísland getur gert slíkt hið sama gegn Norður-Makedónum á sunnudag.
