Knattspyrnusérfræðingar hafa nokkrir gagnrýnt Jóhannes Karl Guðjónsson þjálfara ÍA fyrir að hafa skellt sér stutt frí til Tenerife. Ástæðan fyrir gagnrýninni er bikarúrslitaleikur ÍA gegn Víkingi á laugardag.

Rætt var um málið í hlaðvarpsþáttum landsins og voru margir hissa á ferð Jóa Kalla. „Ég get lofað þér því að Víkingar eru að æfa og Skagamenn eru að æfa líka en bara undir aðstoðarþjálfara og með fjóra menn í 21 árs liðs verkefni. Þetta er ákvörðun sem formaðurinn stendur og fellur með. Mér finnst þetta skrítið og hefði bara viljað frestað ferðinni,“ sagði Kristján Óli Sigurðsson meðal annars um málið.

Jóhannes var til svars á fréttamannafundi fyrir bikarúrslitaleikinn í dag og sagði. „Ég átti fína daga í sólinni og náði að hlaða. Ég get ekki stýrt umræðunni hvernig hún fer fram, það voru tvær vikur á milli leikja,“ sagði Jóhannes Karl við 433.is.

Ferð Jóhannesar var í styttri kantinum og hafði að hans sögn enginn áhrif á liðið. „Ég fór frá þriðjudegi til laugardags. Þetta hafði ekki nein áhrif á faglega þjálfun liðsins, ég fékk fullan skilning fyrir því hjá öllum í félaginu.“

Skagamenn hafa lítið kippt sér upp við málið sem rakið hefur verið í fjölmiðlum. „Þetta var mikið stærra mál í umfjöllun heldur en það var hjá okkur. Það er bara þannig, menn verða að hafa eitthvað til að tala um,“ sagði Jóhannes léttur.

Leikur ÍA og Víkings fer fram klukkan 15:00 á laugardag en búist er við um 6 þúsund áhorfendum á leikinn.