Jordon Ibe kantmaður Derby County er að glíma við mikið þunglyndi og segist vera á erfiðum stað þessa stundina, hann hefur upplifað erfiða tíma síðustu ár.

Ibe kom ungur upp hjá Liverpool og voru miklar væntingar gerðar til hans, hann náði eki að standa undir væntingum og var seldur til Bournemouth fyrir háa upphæð.

Hjá Bournemouth stóð hann ekki undir væntingum og upplifði erfiða tíma, hann missti svo ökuréttindi sín í sumar eftir að hafa keyrt inn á kaffihús í London. Hann flúði af vettvangi en fannst að lokum.

„Ég vil biðja stuðningsmenn mína um allan heim afsökunar, ég hef verið í dimmum dal og er að berjast við þunglyndi. Þetta er ekki gert til að fá athygli í fjölmiðlum, lífið er bara verulega erfitt núna,“ skrifar Ibe í færslu á Instagram.

„Ég kann að meta ástina og skilaboðin, lífið er erfitt fyrir flesta vegna heimsfaraldurs. Ég hef stuðning frá fjölskyldunni og Derby County.“

„Ég mun koma mér í gott jafnvægi og ætla mér, ekki bara fyrir fjölskyldu vini og dóttur mína. Heldur fyrir mig sjálfan.“