Leicester City tók á móti Chelsea í ensku úrvalsdeildinni í kvöld. Leikurinn endaði með 2-0 sigri Leicester en leikið var á heimavelli liðsins, King Power Stadium.
Wilfred Ndidi, kom Leicester yfir með marki á 6. mínútu eftir stoðsendingu frá Harvey Barnes.
Á 41. mínútu tvöfaldaði James Maddison, forystu Leicester með marki eftir stoðsendingu frá Marc Albrighton.
Fleiri mörk voru ekki skoruð í leiknum sem endaði með 2-0 sigri Leicester. Staða Frank Lampard, knattspyrnustjóra Chelsea, er nú orðin mjög völt.
TalkSport hélt því fram í dag að knattspyrnustjórinn ungi gæti verið rekinn ef Chelsea myndi tapa í kvöld. Liðið er í 8. sæti deildarinnar eftir leik kvöldsins með 29 stig eftir 19 leiki sem getur ekki talist ásættanleg staða af forráðamönnum félagsins eftir að hafa eytt miklum fjárhæðum til leikmannakaupa fyrir tímabilið.
Leicester City komst með sigrinum upp í 1. sæti deildarinnar þar sem liðið situr með 38 stig, einu stigi meira en Manchester United í 2. sæti sem á leik til góða.
Leicester City 2 – 0 Chelsea
1-0 Wilfried Ndidi (‘6)
2-0 James Maddison (’41)
