Hinn 18 ára gamli Declan Thompson, leikmaður Sheffield Wednesday, spilaði í gær sinn fyrsta aðalliðsleik fyrir liðið er hann kom inn á sem varamaður í 2-0 sigri liðsins gegn Exeter í enska bikarnum.
Stuttu eftir leik liðanna fór myndband í dreifingu á samfélagsmiðlum sem sýndu viðbrögð föður Declan, þegar strákurinn kom inn á, í sínum fyrsta leik fyrir liðið.
Lee Thompson, faðir Declan, var skiljanlega mjög stoltur af syni sínum og það brutust út mikil fagnaðrlæti og tár féllu.
Lee birti myndbandið sjálfur á samfélagsmiðlinum Twitter og skrifaði hjartnæm skilaboð til sonar síns.
„Ég trúi því ekki hversu stoltur ég er, Declan, ég elska þig sonur og ég get ekki hætt að gráta,“ voru skilaboð Lee.
Omg can’t believe how proud I am @Decthompson09 I love you son can’t stop crying ❤️❤️❤️❤️⚽️ pic.twitter.com/nc2Se19HV8
— Lee Thompson (@LeeThom25796166) January 9, 2021
Þegar Declan var yngri var honum tjáð að hann hefði ekki það sem til þyrfti til þess að geta orðið atvinnumaður í knattspyrnu.
„Mér var sagt að ég myndi ekki spila knattspyrnu. Nú vil ég vera til staðar fyrir aðra unga krakka og hjálpa þeim að ná sínum markmiðum,“ sagði Declan í viðtali við swfc.co.uk.
Declan skrifaði undir sinn fyrsta atvinnumannasamning hjá Sheffield Wednesday á síðasta ári, hann horfði á myndbandið með viðbrögðum foreldra sinna eftir leikinn í gær.
„Það var tilfinningaþrungið að horfa á myndbandið með viðbrögðum foreldra minna. Bara það að vita að ég gerði þau stolt, þið sjáið hversu miku máli þetta skipti,“ sagði hinn 18 ára gamli Declan Thompson.
