David Alaba, nýr leikmaður Real Madrid, fær 376 þúsund pund (tæpar 65 milljónir íslenskra króna) í vikulaun hjá nýja félagi sínu. Leikmaðurinn gerði fimm ára samning og verður því búinn að safna upp 98 milljónum punda (tæpum 17 milljörðum íslenskra króna) þegar samningur hans rennur út. Það var þýski miðillinn Der Spiegel sem lak tölunum.
Hinn 29 ára gamli Alaba kom til Real frá Bayern Munchen á frjálsri sölu í sumar. Austurríkismaðurinn hafði verið hjá Bayern frá árinu 2008.
Með félaginu vann hann fjölmarga titla. Hann varð til að mynda Þýskalandsmeistari tíu sinnum og Evrópumeistari tvisvar sinnum.
Nú tekur við nýr kafli á ferli hans. Hann fær það verkefni að reyna að hjálpa Real að tryggja sér Spánarmeistaratitilinn. Nágrannarnir í Atletico unnu titilinn á síðustu leiktíð.
