Danski framherjinn Oliver Haurits er á leið í Stjörnuna. Það var greint frá þessu í hlaðvarpsþættinum Dr. Football í dag.

Haurits, sem er aðeins tvítugur að aldri, leikur með Skive í dönsku B-deildinni. Hann skoraði fjögur mörk í 19 leikjum á síðustu leiktíð.

Framherjinn ungi hefur einnig leikið með Næstved í Danmörku í meistaraflokki. Hann lék með yngri liðum Viborg og Silkeborg.

Það er nóg að gera á skrifstofunni hjá Stjörnunni. Fyrr í dag tilkynntu þeir að Casper Sloth væri kominn til félagsins.

Sloth er 29 ára gamall miðjumaður. Hann lék síðast með Helsingör í dönsku B-deildinni. Hann hefur einnig leikið með AGF, AaB og Silkeborg í heimalandinu. Þá lék hann einnig með Leeds og Notts County á Englandi sem og Motherwell í Skotlandi.