Andre Silva, framherji Frankfurt, er orðaður við Manchester United. Ole Gunnar Solskjær, stjóri Man Utd, gæti freistað þess að fá inn framherja í sumar. Leikmaðurinn sjálfur segir orðróminn vera hvatningu.

Silva, sem skrifaði undir þriggja ára samning við Frankfurt síðasta sumar, hefur átt mjög gott tímabil með þýska liðinu og skorað 24 mörk og átt 9 stoðsendingar í öllum keppnum. Það hefur vakið áhuga annara liða.

Á tímabili voru sögusagnir á sveimi þess efnis að leikmaðurinn væri fáanlegur fyrir 26 milljónir punda vegna klásúlu í samningi sínum. Umboðsmaður Silva hefur þó vísað því á bug.

Ekki er vitað hvort Edinson Cavani verði áfram hjá Man Utd eftir þetta tímabil. Þá hefur Anthony Martial verið slakur á tímabilinu. Solskjær gæti því séð Silva sem kost í framlínu sína.

Fyrr í mánuðinum sagði Silva að orðrómar um hugsanleg skipti á Old Trafford sé viðurkenning og á sama tíma hvatning til að gera vel í þeim leikjum sem eftir eru á tímabilinu.