Allur leikmannahópur meistaraflokks FH hefur verið sendur í sóttkví vegna smits sem kom upp hjá leikmanni félagsins. Þetta staðfestir Valdimar Svavarsson formaður knattspyrnudeildar FH í samtali við 433.is.

Smitið greindist í gær en erfiðlega hefur gengið að rekja upprunan á smitinu hjá umræddum leikmanni.

„Það kom upp í gær að einn leikmaður greindist með veiruna, það er búið að vera mikið í gangi í Hafnarfirði undanfarið,“ sagði Valdimar um málið.

FH-ingar hafa æft í tíu manna hópum síðustu daga en passað upp á allar reglur, þrátt fyrir það var allur leikmannahópur liðsins sendur í sóttkví fram yfir páska.

„Við vildum bregðast við þannig að þó að við séum að æfa í hólfum og allt það, þá settum við allan hópinn í sóttkví fram yfir páska, þannig að við séum öryggir. Við viljum ekki stuðla að frekari útbreiðslu, fyrst að það eru páskar og smá frí. Þá tökum við enga sénsa,“ sagði Valdimar.

Valdimar segir að ekki sé hægt að útiloka að leikmenn ræði saman utan æfinga og því hafi allur hópurinn verður sendur í sóttkví. „Maður getur aldrei útilokað smá tengsl á milli, við vonum að þetta sé ekkert. Það er ekkert vitað hvaðan þetta smit kom, hann fór strax í skimun þegar það voru einhver einkenni,“ sagði Valdimar.