Glen Johnson, fyrrverandi Leikmaður Liverpool, telur að Jurgen Klopp, knattspyrnustjóri liðsins, gæti verið rekinn ef honum tekst ekki að snúa við gengi Liverpool.
Liverpool hefur tapað fjórum af síðustu fimm leikjum sínum í ensku úrvalsdeildinni. Liðið situr í 6. sæti deildarinnar með 40 stig eftir 25 leiki. Liðið er þó komið í 16- liða úrslit Meistaradeildar Evrópu og á góðan möguleika á að komast áfram í keppninni.
Johnson telur að árangur Klopp með Liverpool á síðasta tímabili valdi því að hann muni ekki vera rekinn á yfirstandandi tímabili.
„Starf Klopp hjá Liverpool er öruggt sem stendur, á næsta ári gæti staðan verið öðruvísi. Það er ekki hægt að tala um að Liverpool reki hann á þessu tímabili vegna þess að hann hefur gert ótrúlega hluti fyrir félagið. Á þessu gæðastigi knattspyrnunnar geta hlutirnir þó breyst fljótt,“ sagði Glen Johnson í samtali við CheltenhamGuides.com.
Klopp segist sjálfur ekki hafa áhyggjur af starfi sínu hjá Liverpool en þýska blaðið Bild, segist hafa heimildir fyrir því að góðar líkur séu á að Klopp gæti tekið við þýska landsliðinu eftir Heimsmeistaramótið í Katar árið 2022.
