Manchester City vonast til þess að klásúla í samningi félagsins við Dortmund er varðar Jadon Sancho, muni á endanum hjálpa félaginu að kaupa Erling Haaland frá félaginu.

Fullyrt er að Haaland sé efstur á óskalista City næsta sumar til að fylla skarð Kun Aguero sem virðist á förum frá félaginu.

Aguero hefur verið meiðslum hrjáður síðustu mánuði og er samningur hans við City á enda í sumar, sagt er að félagið skoði arftaka hans nú að fullum krafti.

Sancho fór ungur að árum til Dortmund frá Manchester City, í samningi félaganna er klásúla sem gefur City 15 prósent af söluverði Sancho.

Dortmund vill meira en 100 milljónir punda fyrir Sancho og er sú klásúla því dýrmæt fyrir City. Félagið vonast til að nota hana og láta hana falla úr gildi til þess að klófesta Haaland.

Haaland hefur átt frábært ár með Dortmund en hann gæti yfirgefið félagið næsta sumar ef gott tilboð kemur á borð Dortmund.